10-ാം ദിവസം – പ്രായശ്ചിത്തത്തിലൂടെയും ആത്മനിഗ്രഹത്തിലൂടെയും ലോകത്തിന്റെ ആത്മാവിൽ നിന്ന് സ്വയം ശൂന്യമാക്കുക

“ആദ്യഘട്ടം, ലോകാരൂപിയെ ബഹിഷ്ക്കരിക്കുന്നതിൽ ഉപയോഗിക്കുക. അത് യേശുവിന്റെ അരൂപിക്കു കടകവിരുദ്ധമാണല്ലോ.” ദൈവത്തിന്റെ സർവ്വാധികാരത്തെ നിഷേധിക്കുകയാണല്ലോ ലോകാരൂപി ചെയ്യുക. പാപവും അനുസരണക്കേടും വഴിയാണ് ഈ നിഷേധം പ്രകടമാകുന്നത്. അങ്ങനെ യേശുവിന്റെയും മറിയത്തിന്റെയും അരൂപിക്കു വലിയ പ്രതിബന്ധം സൃഷ്ടിക്കുന്നു. മാംസത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹങ്കാരം ഇവയെ അതു സ്വയം പ്രകടമാക്കുകയും അങ്ങനെ ദൈവികനിയമത്തെ ധിക്കരിക്കുകയും സൃഷ്ടികളെ ദുരുപയോഗിക്കുകയും ചെയ്യുന്നു. എല്ലാത്തരത്തിലുമുള്ള പാപങ്ങൾ, പാപത്തിലേക്കുള്ള പിശാചിന്റെ പ്രേരണകൾ, മനസ്സിനെ തെറ്റിലേക്കും അന്ധതയിലേക്കും നയിക്കുന്നവ, ഇച്ഛാശക്തിയെ തിന്മയിലേക്കു വശീകരിക്കുന്നവ – ഇവയൊക്കെയാണ് ലോകത്തിന്റെ പ്രവൃത്തികൾ. വ്യക്തികളും, സ്ഥലങ്ങളും, വസ്തുക്കളും വഴി പാപത്തിലേക്കു വഴുതിവീഴുവാൻ തക്കവിധത്തിൽ പ്രയോഗിക്കുന്ന വശീകരണങ്ങളും പുറംമോടികളുമാണ് അവന്റെ ആഡംബരങ്ങൾ.

ശിഷ്യൻ: ദൈവമേ, ഇപ്പോൾ ഞാൻ സംസാരിക്കും. ഞാൻ നിശ്ശബ്ദനായിരിക്കയില്ല; ഉന്നതനായ എന്റെ ഈശ്വരൻ, എന്റെ ദൈവം, എന്റെ രാജാവ് കേൾക്കത്തക്കവണ്ണം ഞാൻ ഇപ്രകാരം പറയും: ‘ദൈവമേ, അങ്ങയെ ഭയപ്പെടുന്നവർക്കായി അങ്ങു ഗൂഢമായി സൂക്ഷിച്ചുവച്ചിരിക്കുന്ന അങ്ങയുടെ മാധുര്യം എത്ര മഹത്താകുന്നു!’ (സങ്കീ. 30:20) എന്നാൽ, അങ്ങയെ സ്നേഹിക്കുന്നവർക്ക് അങ്ങാര്? പൂർണ്ണഹൃദയത്തോടെ സ്നേഹിക്കുന്നവർക്ക് അങ്ങാര്? അങ്ങയെ സ്നേഹിക്കുന്നവർക്ക് അങ്ങ് നല്കുന്ന ദൈവധ്യാനമാധുര്യം അവാച്യമാണ്. ഇല്ലായ്മയിൽ നിന്ന് അങ്ങ് എന്നെ സൃഷ്ടിക്കയും ഞാൻ അങ്ങയിൽ നിന്ന് അകന്നുപോയപ്പോൾ അങ്ങയെ സേവിക്കുന്നതിന് എന്നെ അങ്ങു തിരിച്ചുകൊണ്ടുവരികയും, അങ്ങയെ സ്നേഹിക്കുന്നതിന് എന്നോട് അങ്ങ് ആജ്ഞാപിക്കയും ചെയ്തിരിക്കുന്നുവെന്നതിലാണ് അങ്ങയുടെ സ്നേഹമാധുര്യം സവിശേഷം പ്രകടമായത്. 2. ഒരിക്കലും വറ്റാത്ത സ്നേഹത്തിന്റെ ഉറവേ, എന്താണ് ഞാൻ അങ്ങയോട് പറയേണ്ടത്? ഞാൻ ദുഷിച്ചു നശിച്ചുപോയിട്ടും എന്നെ ഓർമ്മിക്കുന്നതിന് കൃപയുണ്ടായ അങ്ങയെ ഞാൻ എങ്ങനെ വിസ്മരിക്കും? അങ്ങു പ്രതീക്ഷയ്ക്കതീതമായ കരുണ അങ്ങയുടെ ദാസനോട് പ്രകടിപ്പിച്ചിരിക്കുന്നു. ഞാൻ ഒരിക്കലും അർഹിക്കാത്ത അങ്ങയുടെ അനുഗ്രഹവും സൗഖ്യവും എനിക്ക് പ്രദാനം ചെയ്തിരിക്കുന്നു. അങ്ങേയ്ക്ക് ഞാൻ എന്തു പ്രത്യുപകാരം ചെയ്യും? എന്തുകൊണ്ടെന്നാൽ സർവവും ഉപേക്ഷിച്ച് ലോകത്തെ ത്യജിച്ച് സന്യാസജീവിതം സ്വീകരിക്കുന്നതിനുള്ള അനുഗ്രഹം എല്ലാവർക്കും നല്കപ്പെട്ടിട്ടുള്ളതല്ല. സകല സൃഷ്ടികളും സേവിക്കുന്നതിന് കടപ്പെട്ടിരിക്കുന്ന അങ്ങയെ ഞാൻ സേവിക്കുന്നത് ഒരു വലിയ കാര്യമാണോ? അങ്ങയെ സേവിക്കുന്നത് ഞാൻ വലിയ കാര്യമായി വിചാരിക്കേണ്ടതില്ല. എന്നാൽ, ഇത്ര നിസ്സാരനും അയോഗ്യനുമായ ഒരുവനെ അങ്ങയുടെ സേവനത്തിനായി സ്വീകരിക്കുകയും അങ്ങയുടെ സ്നേഹഭാജനങ്ങളായ ദാസന്മാരുടെ സംഘത്തിൽ അംഗമാക്കുകയും ചെയ്യാൻ അങ്ങേയ്ക്ക് കൃപയുണ്ടായത് മഹനീയവും ആശ്ചര്യാവഹവുമാണ്. അങ്ങയോടുള്ള സ്നേഹം നിമിത്തം എല്ലാ ജഡികസുഖങ്ങളെയും ത്യജിക്കുന്നവർക്ക് പരിശുദ്ധാത്മാവിന്റെ ഏറ്റവും മധുരമായ സമാശ്വാസം ലഭ്യമാണ്.