11-ാം ദിവസം – പ്രായശ്ചിത്തത്തിലൂടെയും ആത്മനിഗ്രഹത്തിലൂടെയും ലോകത്തിന്റെ ആത്മാവിൽ നിന്ന് സ്വയം ശൂന്യമാക്കുക

“ആദ്യഘട്ടം, ലോകാരൂപിയെ ബഹിഷ്ക്കരിക്കുന്നതിൽ ഉപയോഗിക്കുക. അത് യേശുവിന്റെ അരൂപിക്കു കടകവിരുദ്ധമാണല്ലോ.” ദൈവത്തിന്റെ സർവ്വാധികാരത്തെ നിഷേധിക്കുകയാണല്ലോ ലോകാരൂപി ചെയ്യുക. പാപവും അനുസരണക്കേടും വഴിയാണ് ഈ നിഷേധം പ്രകടമാകുന്നത്. അങ്ങനെ യേശുവിന്റെയും മറിയത്തിന്റെയും അരൂപിക്കു വലിയ പ്രതിബന്ധം സൃഷ്ടിക്കുന്നു. മാംസത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹങ്കാരം ഇവയെ അതു സ്വയം പ്രകടമാക്കുകയും അങ്ങനെ ദൈവികനിയമത്തെ ധിക്കരിക്കുകയും സൃഷ്ടികളെ ദുരുപയോഗിക്കുകയും ചെയ്യുന്നു. എല്ലാത്തരത്തിലുമുള്ള പാപങ്ങൾ, പാപത്തിലേക്കുള്ള പിശാചിന്റെ പ്രേരണകൾ, മനസ്സിനെ തെറ്റിലേക്കും അന്ധതയിലേക്കും നയിക്കുന്നവ, ഇച്ഛാശക്തിയെ തിന്മയിലേക്കു വശീകരിക്കുന്നവ – ഇവയൊക്കെയാണ് ലോകത്തിന്റെ പ്രവൃത്തികൾ. വ്യക്തികളും, സ്ഥലങ്ങളും, വസ്തുക്കളും വഴി പാപത്തിലേക്കു വഴുതിവീഴുവാൻ തക്കവിധത്തിൽ പ്രയോഗിക്കുന്ന വശീകരണങ്ങളും പുറംമോടികളുമാണ് അവന്റെ ആഡംബരങ്ങൾ.

1. ഈശ്വരസേവനത്തിൽ ജാഗരൂകനും ഉത്സാഹിയുമായിരിക്കുക; നീ എന്തിനിവിടെ വന്നുവെന്നും എന്തുകൊണ്ട് ലോകത്തെ ഉപേക്ഷിച്ചുവെന്നും കൂടെക്കൂടെ ആലോചിക്കുക; ഈശ്വരനുവേണ്ടി ജീവിച്ച് ആത്മീയകാര്യനിരതനായിരിക്കുന്നതിനല്ലേ? അതുകൊണ്ട്, ആത്മീയാഭിവൃദ്ധിയിൽ ശുഷ്കാന്തിയുള്ളവനായിരിക്കുക; എന്തുകൊണ്ടെന്നാൽ നിന്റെ പ്രയത്നങ്ങൾക്ക് അചിരേണ നിനക്ക് സമ്മാനം ലഭിക്കും; അപ്പോൾ പിന്നെ ദുഃഖവും ഭയവും നിന്നെ സമീപിക്കുകയില്ല. ഇപ്പോൾ അല്പം പ്രയത്നിച്ചാൽ നിനക്ക് വലുതായ വിശ്രമം, അല്ല അനന്തമായ ആനന്ദം സിദ്ധിക്കും. നീ പ്രവൃത്തിയിൽ വിശ്വാസയോഗ്യനും ശുഷ്കാന്തിയുള്ളവനുമാണെങ്കിൽ, ഈശ്വരൻ സമ്മാനം തരുന്നതിൽ തീർച്ചയായും വിശ്വാസയോഗ്യനും ഉദാരനുമായിരിക്കും. വിജയമകുടം പ്രാപ്യമാണെന്ന ദൃഢമായ പ്രത്യാശ നിനക്കുണ്ടായിരിക്കും; എന്നാൽ, ആപത്ത് നിശ്ശേഷം ഒഴിഞ്ഞ അവസ്ഥ പ്രാപിച്ചുവെന്ന് നീ അഭിമാനിക്കരുത്; അങ്ങനെയായാൽ നീ അലസനോ അഹങ്കാരിയോ ആയിത്തീരും. 2. പലപ്പോഴും പ്രത്യാശയ്ക്കും ഭയത്തിനും മാറിമാറി വശംവദനാകുന്നതിൽ, ഉത്കണ്ഠാകുലനായ ഒരുവൻ ഒരിക്കൽ ദുഃഖപരവശനായി ദൈവാലയത്തിലെ ബലിപീഠത്തിൽ സാഷ്ടാംഗപ്രണാമം ചെയ്ത് പ്രാർത്ഥിച്ചുകൊണ്ട് ഇങ്ങനെ ആത്മഗതം ചെയ്തു: ‘ഞാൻ ഇനിയും ഭക്തിയിൽ തുടർന്നു പോകുമോ എന്നുള്ള ബോധം എനിക്കുണ്ടായെങ്കിൽ!’ അപ്പോൾ, അവൻ ഈശ്വരനിൽ നിന്ന് ഈ മറുപടി അന്തഃരംഗത്തിൽ കേട്ടു: ‘അത് അറിഞ്ഞുവെങ്കിൽ എന്തു ചെയ്യും? അപ്പോൾ നീ എന്തു ചെയ്യുമോ അത് ഇപ്പോൾ ചെയ്യുക; അങ്ങനെ ചെയ്താൽ നിനക്ക് നിർഭയനായിയിരിക്കാം.’ ഉടനടി അവന് സമാശ്വാസവും ധൈര്യവും സിദ്ധിച്ചു. നീ മറ്റുള്ളവരെ നിരീക്ഷിക്കുന്നതുപോലെ നിന്നെ മറ്റുള്ളവരും നിരീക്ഷിക്കുന്നുണ്ട്. ഓ! സഹോദരന്മാർ തീക്ഷ്ണതയും ഭക്തിയുമുള്ളവരും നിയമാനുസാരികളും സുശിക്ഷിതരും ആയി കാണപ്പെടുന്നത് എത്ര മധുരവും ആശ്വാസപ്രദവുമാണ്! ക്രമരഹിതമായി ജീവിക്കുകയും തങ്ങളുടെ കർത്തവ്യങ്ങൾ അനുഷ്ഠിക്കാതിരിക്കുകയും ചെയ്യുന്നവരെ കാണുന്നത് എത്ര വ്യസനകരവും മർമഭേദകവുമാണ്! നമ്മുടെ ആശ്രമധർമ്മത്തെ അവഗണിക്കുകയും നമ്മുടെ കർത്തവ്യമല്ലാത്ത സംഗതികളിലേക്ക് ശ്രദ്ധ തിരിക്കുകയും ചെയ്യുന്നത് എത്ര ദോഷകരമാണ്! 6. നീ സ്വീകരിച്ചിരിക്കുന്ന വ്രതത്തെപ്പറ്റി ജാഗരൂകനായിരിക്കുകയും ക്രൂശിതനായ രക്ഷകന്റെ പ്രതിബിംബത്തെ നിന്റെ മുന്നിൽ പ്രതിഷ്ഠിക്കുകയും ചെയ്യുക. യേശുക്രിസ്തുവിന്റെ ജീവിതത്തെ നീ സമീക്ഷണം ചെയ്തിട്ടുണ്ടെങ്കിൽ, ദിവ്യമാർഗത്തിൽ ദീർഘകാലം സ്ഥിതി ചെയ്തിട്ടും അദ്ദേഹത്തിന്റെ മാതൃക അനുകരിക്കാൻ നീ ഇനിയും ശ്രമിച്ചിട്ടില്ലെന്നത് ലജ്ജാവഹമാണ്. നമ്മുടെ രക്ഷാനാഥന്റെ പരിപാവനമായ ജീവിതത്തെയും പീഡാനുഭവത്തെയും കുറിച്ച് ചിന്തിച്ച് ഗൗരവത്തോടും ഭക്തിയോടും കൂടി തപശ്ചര്യകൾ അനുഷ്ഠിച്ചിട്ടുള്ള സന്ന്യാസി തനിക്ക് ഗുണകരവും ആവശ്യകരവുമായ സകല സംഗതികളും ആ ജീവിതത്തിലും പീഡാനുഭവത്തിലും കാണുന്നതായിരിക്കും; യേശുവിന്റേതിനേക്കാൾ നല്ല ഒരു മാതൃക അയാൾ അന്വേഷിക്കേണ്ടതില്ല. ഓ! നമ്മുടെ ക്രൂശിതനായ യേശു നമ്മുടെ ഹൃദയങ്ങളിൽ ആഗതനായെങ്കിൽ നമുക്ക് ആവശ്യമുള്ളിടത്തോളം അറിവ് എത്ര വേഗം ലഭിക്കുമായിരുന്നു!