9-ാം ദിവസം – പ്രായശ്ചിത്തത്തിലൂടെയും ആത്മനിഗ്രഹത്തിലൂടെയും ലോകത്തിന്റെ ആത്മാവിൽ നിന്ന് സ്വയം ശൂന്യമാക്കുക

“ആദ്യഘട്ടം, ലോകാരൂപിയെ ബഹിഷ്ക്കരിക്കുന്നതിൽ ഉപയോഗിക്കുക. അത് യേശുവിന്റെ അരൂപിക്കു കടകവിരുദ്ധമാണല്ലോ.” ദൈവത്തിന്റെ സർവ്വാധികാരത്തെ നിഷേധിക്കുകയാണല്ലോ ലോകാരൂപി ചെയ്യുക. പാപവും അനുസരണക്കേടും വഴിയാണ് ഈ നിഷേധം പ്രകടമാകുന്നത്. അങ്ങനെ യേശുവിന്റെയും മറിയത്തിന്റെയും അരൂപിക്കു വലിയ പ്രതിബന്ധം സൃഷ്ടിക്കുന്നു. മാംസത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹങ്കാരം ഇവയെ അതു സ്വയം പ്രകടമാക്കുകയും അങ്ങനെ ദൈവികനിയമത്തെ ധിക്കരിക്കുകയും സൃഷ്ടികളെ ദുരുപയോഗിക്കുകയും ചെയ്യുന്നു. എല്ലാത്തരത്തിലുമുള്ള പാപങ്ങൾ, പാപത്തിലേക്കുള്ള പിശാചിന്റെ പ്രേരണകൾ, മനസ്സിനെ തെറ്റിലേക്കും അന്ധതയിലേക്കും നയിക്കുന്നവ, ഇച്ഛാശക്തിയെ തിന്മയിലേക്കു വശീകരിക്കുന്നവ – ഇവയൊക്കെയാണ് ലോകത്തിന്റെ പ്രവൃത്തികൾ. വ്യക്തികളും, സ്ഥലങ്ങളും, വസ്തുക്കളും വഴി പാപത്തിലേക്കു വഴുതിവീഴുവാൻ തക്കവിധത്തിൽ പ്രയോഗിക്കുന്ന വശീകരണങ്ങളും പുറംമോടികളുമാണ് അവന്റെ ആഡംബരങ്ങൾ.

പ്രലോഭനത്തിന്റെ ആരംഭത്തിൽ നാം പ്രത്യേകം ജാഗരൂകരായിരിക്കണം; എന്തുകൊണ്ടെന്നാൽ, ശത്രുവിനെ ആത്മാവിൽ പ്രവേശിക്കാൻ അനുവദിക്കാതെ പുറത്തുനിറുത്തുകയും, ഒന്നാം പ്രാവശ്യം വാതിലിൽ മുട്ടുമ്പോൾ തന്നെ നിരോധിക്കയും ചെയ്താൽ കുറെക്കൂടി എളുപ്പം പരാജിതനാക്കാം. അതുകൊണ്ട് ഒരു മഹാൻ ഇപ്രകാരം പറയുന്നു: “ആരംഭത്തിലേ നിരോധിക്കുക; കാലം അതിക്രമിച്ചാൽ പ്രതിവിധികൾ ഫലിക്കില്ല.” എന്തുകൊണ്ടെന്നാൽ, ആദ്യമായി കേവലമായ വിചാരം മനസ്സിലുദിക്കുന്നു; പിന്നീട് ശക്തിമത്തായ ഭാവന; അനന്തരം സന്തോഷാനുഭൂതിയും ആസക്തിയും മനസ്സമ്മതവും ഉളവാകുന്നു. അങ്ങനെ ആരംഭത്തിൽ നിരോധിക്കപ്പെടാതിരുന്നാൽ ശത്രുവിന് പടിപടിയായി പൂർണ്ണമായ പ്രവേശനം സിദ്ധിക്കുന്നു. പ്രലോഭനനിരോധനത്തിൽ മനുഷ്യൻ എത്രകാലം ഉദാസീനനായിരിക്കുന്നുവോ, അത്രകാലം ദിവസംപ്രതി അവൻ കൂടുതൽ ദുർബലനായും ശത്രു കൂടുതൽ ബലവാനായും തീരുന്നു. 7. ചിലർ തങ്ങളുടെ ജീവിതപരിവർത്തനത്തിന്റെ ആരംഭത്തിലും ചിലർ അവസാനത്തിലും വലിയ പ്രലോഭനങ്ങൾ അനുഭവിക്കുന്നു. ചിലരാകട്ടെ, അവരുടെ ജീവിതകാലം മുഴുവനും ഘോരമായി പീഡിപ്പിക്കപ്പെടുന്നു. മനുഷ്യരുടെ സ്ഥിതിയെയും യോഗ്യതകളെയും ശരിക്കു നിർണ്ണയിക്കുകയും തെരഞ്ഞെടുക്കപ്പെട്ട ജനങ്ങളുടെ മുക്തിക്കായി സകലവും മുൻകൂട്ടി വ്യവസ്ഥപ്പെടുത്തുകയും ചെയ്യുന്ന ദൈവത്തിന്റെ ബുദ്ധിപൂർവ്വവും നീതിയുക്തവുമായ നിയമമനുസരിച്ച് ചിലർ ലഘുവായി മാത്രം പ്രലോഭിപ്പിക്കപ്പെടുന്നു. 8. അതുകൊണ്ട് പ്രലോഭനമുണ്ടാകുമ്പോൾ നിരാശപ്പെടരുത്; സകല കഷ്ടപ്പാടുകളിലും നമ്മെ സഹായിക്കാൻ ദൈവത്തോട് നാം കൂടുതൽ ശുഷ്കാന്തിയോടെ പ്രാർത്ഥിക്കണം; അദ്ദേഹം തീർച്ചയായും സെന്റ് പൗലോശ്ലീഹാ പറഞ്ഞതുപോലെ ‘പ്രലോഭനത്തെ താങ്ങുന്നതിന് നമ്മെ പ്രാപ്തരാക്കിത്തീർക്കും’ (1 കൊറി. 10:13). അതുകൊണ്ട് എല്ലാ പ്രലോഭനങ്ങളിലും കഷ്ടപ്പാടുകളിലും നാം നമ്മുടെ ആത്മാക്കളെ ദൈവത്തിന്റെ കരങ്ങളിൽ നമിപ്പിക്കുക; എന്തുകൊണ്ടെന്നാൽ ‘ദൈവം ആത്മാവിൽ വിനീതരെ രക്ഷിക്കുകയും ഉയർത്തുകയും ചെയ്യും’ (സങ്കീ. 33:19). 9. ഒരു മനുഷ്യൻ പുണ്യത്തിൽ എത്രമാത്രം അഭിവൃദ്ധി പ്രാപിച്ചിട്ടുണ്ടെന്ന് കഷ്ടതകളിലും പ്രലോഭനങ്ങളിലും തെളിയുന്നു; അവയിൽ മഹത്തരമായ യോഗ്യത അടങ്ങിയിരിക്കുകയും അവന്റെ ശക്തി കൂടുതൽ പ്രത്യക്ഷമാവുകയും ചെയ്യുന്നു.