4-ാം ദിവസം – പ്രായശ്ചിത്തത്തിലൂടെയും ആത്മനിഗ്രഹത്തിലൂടെയും ലോകത്തിന്റെ ആത്മാവിൽ നിന്ന് സ്വയം ശൂന്യമാക്കുക

“ആദ്യഘട്ടം, ലോകാരൂപിയെ ബഹിഷ്ക്കരിക്കുന്നതിൽ ഉപയോഗിക്കുക. അത് യേശുവിന്റെ അരൂപിക്കു കടകവിരുദ്ധമാണല്ലോ.” ദൈവത്തിന്റെ സർവ്വാധികാരത്തെ നിഷേധിക്കുകയാണല്ലോ ലോകാരൂപി ചെയ്യുക. പാപവും അനുസരണക്കേടും വഴിയാണ് ഈ നിഷേധം പ്രകടമാകുന്നത്. അങ്ങനെ യേശുവിന്റെയും മറിയത്തിന്റെയും അരൂപിക്കു വലിയ പ്രതിബന്ധം സൃഷ്ടിക്കുന്നു. മാംസത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹങ്കാരം ഇവയെ അതു സ്വയം പ്രകടമാക്കുകയും അങ്ങനെ ദൈവികനിയമത്തെ ധിക്കരിക്കുകയും സൃഷ്ടികളെ ദുരുപയോഗിക്കുകയും ചെയ്യുന്നു. എല്ലാത്തരത്തിലുമുള്ള പാപങ്ങൾ, പാപത്തിലേക്കുള്ള പിശാചിന്റെ പ്രേരണകൾ, മനസ്സിനെ തെറ്റിലേക്കും അന്ധതയിലേക്കും നയിക്കുന്നവ, ഇച്ഛാശക്തിയെ തിന്മയിലേക്കു വശീകരിക്കുന്നവ – ഇവയൊക്കെയാണ് ലോകത്തിന്റെ പ്രവൃത്തികൾ. വ്യക്തികളും, സ്ഥലങ്ങളും, വസ്തുക്കളും വഴി പാപത്തിലേക്കു വഴുതിവീഴുവാൻ തക്കവിധത്തിൽ പ്രയോഗിക്കുന്ന വശീകരണങ്ങളും പുറംമോടികളുമാണ് അവന്റെ ആഡംബരങ്ങൾ.

ശിഷ്യൻ: “ദൈവമേ അങ്ങു മനുഷ്യനെ ഓർക്കാൻ അവനാര്? അഥവാ, മനുഷ്യപുത്രനെ അങ്ങു സന്ദർശിക്കാൻ അവനാര്?” (സങ്കീ. 8:5) മനുഷ്യന് അങ്ങയുടെ വരദാനം സ്വീകരിക്കാൻ എന്തുയോഗ്യതയുണ്ട്? ഗുരോ, അങ്ങ് എന്നെ ഉപേക്ഷിച്ചാൽ എനിക്ക് പരാതി പറയാൻ എന്തു കാരണമുണ്ട്? അങ്ങ് എന്റെ പ്രാർത്ഥന നിരസിച്ചാൽ അതിന് എനിക്ക് ആക്ഷേപം പറയാൻ എന്തുണ്ട്? എനിക്ക് ചിന്തിക്കുകയും പറയുകയും ചെയ്യാവുന്നതാണ്; ദൈവമേ ഞാൻ വെറും ശൂന്യനാണ്. എനിക്ക് യാതൊന്നും ചെയ്യാൻ കഴിവില്ല. എനിക്ക് നല്ല യാതൊന്നും സ്വന്തമായി ഇല്ല. ഞാൻ പാവവും നിസ്വനും ശൂന്യതയിലേക്ക് നിരന്തരം ചരിച്ചുകൊണ്ടിരിക്കുന്നവനുമാണ്. 2. എന്നാൽ ദൈവമേ, അങ്ങു നിത്യനും അനന്തനും ഗുണവാനും നീതിമാനും പരിശുദ്ധനുമാണ്; അങ്ങ് എല്ലാ കാര്യങ്ങളും മംഗളകരമായും ന്യായമായും പരിശുദ്ധമായും നിർവഹിക്കുന്നു. എല്ലാം ബുദ്ധിപൂർവ്വം പരിഹരിക്കുന്നു. എന്നാൽ മുമ്പോട്ടുപോകുന്നതിനേക്കാൾ പുറകോട്ട് പോകുന്നതിന് ഞാൻ പ്രേരിതനാകുന്നു. ഞാൻ എല്ലായ്പ്പോഴും ഒരേ നില തുടർന്നുപോകുന്നില്ല. എന്തുകൊണ്ടെന്നാൽ, ‘ഏഴു വിഭിന്നങ്ങളായ കാലങ്ങൾ എന്നെ മാറി മാറി ബാധിക്കുന്നു.’ എങ്കിലും അങ്ങ് പ്രസാദിച്ച് അങ്ങയുടെ കരം എന്നെ സഹായിക്കുന്നതിന് നീട്ടുമ്പോൾ ഞാൻ ക്ഷണേന നന്നാകുന്നു; അങ്ങേയ്ക്കുമാത്രം എന്നെ സഹായിക്കുന്നതിനും എന്റെ ഹൃദയം അങ്ങയോട് അഭിമുഖമാവുകയും അത് അങ്ങയെ മാത്രം അവലംബിക്കയും ചെയ്യത്തക്കവണ്ണം എന്നെ ബലവാനാക്കാനും സാധിക്കുന്നു. 3. അതുകൊണ്ട് അങ്ങയോടുള്ള ഭക്തി മൂലമോ, അങ്ങയെ ആരായുന്നതിനുള്ള ആവശ്യകത മൂലമോ ലോകസുഖം നിശ്ശേഷം ത്യജിക്കാൻ എനിക്ക് കഴിഞ്ഞുവെങ്കിൽ അങ്ങയുടെ അനുഗ്രഹം ലഭിക്കുമെന്ന് എനിക്ക് പ്രത്യാശിക്കയും നവമായ ആശ്വാസലബ്ധിയിൽ സന്തോഷിക്കയും ചെയ്യാമായിരുന്നു.