7-ാം ദിവസം – പ്രായശ്ചിത്തത്തിലൂടെയും ആത്മനിഗ്രഹത്തിലൂടെയും ലോകത്തിന്റെ ആത്മാവിൽ നിന്ന് സ്വയം ശൂന്യമാക്കുക

“ആദ്യഘട്ടം, ലോകാരൂപിയെ ബഹിഷ്ക്കരിക്കുന്നതിൽ ഉപയോഗിക്കുക. അത് യേശുവിന്റെ അരൂപിക്കു കടകവിരുദ്ധമാണല്ലോ.” ദൈവത്തിന്റെ സർവ്വാധികാരത്തെ നിഷേധിക്കുകയാണല്ലോ ലോകാരൂപി ചെയ്യുക. പാപവും അനുസരണക്കേടും വഴിയാണ് ഈ നിഷേധം പ്രകടമാകുന്നത്. അങ്ങനെ യേശുവിന്റെയും മറിയത്തിന്റെയും അരൂപിക്കു വലിയ പ്രതിബന്ധം സൃഷ്ടിക്കുന്നു. മാംസത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹങ്കാരം ഇവയെ അതു സ്വയം പ്രകടമാക്കുകയും അങ്ങനെ ദൈവികനിയമത്തെ ധിക്കരിക്കുകയും സൃഷ്ടികളെ ദുരുപയോഗിക്കുകയും ചെയ്യുന്നു. എല്ലാത്തരത്തിലുമുള്ള പാപങ്ങൾ, പാപത്തിലേക്കുള്ള പിശാചിന്റെ പ്രേരണകൾ, മനസ്സിനെ തെറ്റിലേക്കും അന്ധതയിലേക്കും നയിക്കുന്നവ, ഇച്ഛാശക്തിയെ തിന്മയിലേക്കു വശീകരിക്കുന്നവ – ഇവയൊക്കെയാണ് ലോകത്തിന്റെ പ്രവൃത്തികൾ. വ്യക്തികളും, സ്ഥലങ്ങളും, വസ്തുക്കളും വഴി പാപത്തിലേക്കു വഴുതിവീഴുവാൻ തക്കവിധത്തിൽ പ്രയോഗിക്കുന്ന വശീകരണങ്ങളും പുറംമോടികളുമാണ് അവന്റെ ആഡംബരങ്ങൾ.

3. അവർ ലോകത്തിന് അന്യരായിരുന്നു; എന്നാൽ ദൈവത്തിന്റെ അടുത്ത സുപരിചിതമിത്രങ്ങളായിരുന്നു. അവർ നിസാരന്മാരാണെന്ന് അവർക്ക് തന്നത്താൻ തോന്നുകയും ലോകത്താൽ അവഹേളിക്കപ്പെടുകയും ചെയ്തു; എന്നാൽ ദൈവത്തിന്റെ ദൃഷ്ടിയിൽ അവർ വളരെ വിലയുള്ളവരും അദ്ദേഹത്തിന്റെ പ്രിയഭാജനങ്ങളുമായി. അവർ യഥാർത്ഥ വിനയമുള്ളവരായിരുന്നു; കേവലമായ അനുസരണശീലത്തോടുകൂടി അവർ ജീവിച്ചു; സ്നേഹത്തോടും ക്ഷമയോടും കൂടി അവർ വർത്തിച്ചു. അതുകൊണ്ട് അവർ ദിവസംപ്രതി ആത്മീയമായി പുരോഗമിച്ചു. ഈശ്വരന്റെ വലുതായ ആനുകൂല്യം സമ്പാദിക്കുകയും ചെയ്തു. അവർ എല്ലാ സന്യാസികൾക്കും അനുകരണയോഗ്യരായി നിർദ്ദേശിക്കപ്പെട്ടു; ഭക്തിയിൽ മന്ദോഷ്ണന്മാരായവർ നമ്മിൽ ഔദാസീന്യം വർദ്ധിപ്പിക്കുന്നു. ആത്മീയാഭിവൃദ്ധി പ്രാപിക്കുന്നതിന് വിശുദ്ധർ നമുക്ക് മാതൃകയായിരിക്കേണ്ടതാണ്. 5. ഓ! എല്ലാ സന്യാസികളുടെയും ഭക്തിതീക്ഷ്ണത അവരുടെ പരിശുദ്ധമായ സന്യാസജീവിതത്തിന്റെ ആരംഭത്തിൽ എത്ര മഹത്തായിരുന്നു. ഓ! പ്രാർത്ഥനയിലുള്ള അവരുടെ താല്പര്യം എത്ര വലുതായിരുന്നു! നന്മയ്ക്കായുള്ള അവരുടെ ശുഷ്കാന്തി എത്ര മഹത്തായിരുന്നു! എത്ര വലുതായ ശിക്ഷണം അവരുടെ ഇടയിൽ നിലവിലിരുന്നു! എത്ര മഹത്തായ ഭക്തിയും അനുസരണവും ഒരു മേലധികാരിയുടെ ഭരണത്തിൻ കീഴിൽ എല്ലാവരിലും പരിലസിച്ചിരുന്നു! ഏറ്റവും ശക്തിപൂർവ്വം സമരം ചെയ്ത ലോകത്തെ സ്വപാദങ്ങളുടെ കീഴിലിട്ടു മെതിച്ച അവരുടെ കാലടിപ്പാടുകൾ അവർ യഥാർത്ഥ പരിപൂർണ്ണതയും പരിശുദ്ധിയുമുള്ള മനുഷ്യരായിരുന്നുവെന്നുള്ള സാക്ഷ്യം വഹിക്കുന്നു. പ്രമാണലംഘനം ചെയ്യാത്തവനും, താൻ ഏറ്റെടുത്തവ ക്ഷമയോടെ സഹിച്ച് തുടർന്നുകൊണ്ടുപോകുവാൻ കഴിയുന്നവനും മഹാനായി ഗണിക്കപ്പെടുന്നു. 6. മുമ്പുണ്ടായിരുന്ന ഭക്തിതീക്ഷ്ണതയിൽ നിന്ന് നാം വേഗം വ്യതിചലിച്ചു. അലസതയും മന്ദതയും നിമിത്തം ജീവിതത്തോട് തന്നെ മുഷിവ് തോന്നത്തക്കവണ്ണം നമ്മുടെ സ്ഥിതി, ഹാ, എത്ര മന്ദോഷ്ണവും അലക്ഷ്യവുമായിരിക്കുന്നു! ഭക്തന്മാരുടെ ഒട്ടധികം ദൃഷ്ടാന്തങ്ങൾ കണ്ടിട്ടുള്ള നിന്നിൽ സൽഗുണങ്ങളുടെ അഭിവൃദ്ധി നിലച്ചുപോകാതിരിക്കുന്നതിന് ഈശ്വരൻ അനുഗ്രഹിക്കട്ടെ.